Act 6 | WSK | STEP | Tom mu te kariimet suen biya Jesus ko nongomang ningi nunguning akaso se Kris alo suena kaparam. Se Juda Kris saki Greek den te munakara mu iwita balukasan: “Nuna imet gerewa Hebrew den te munakasan mu na inang tom suen biya nungarsan, bare anananga imet gerewa mu ninguru me nunga sangorsan,” makasan, ale ko iningakasan.

Acts 6

Nuna kari 7 saonga ura betemonko mu nunga balman

1 Tom mu te kariimet suen biya Jesus ko nongomang ningi nunguning akaso se Kris alo suena kaparam. Se Juda Kris saki Greek den te munakara mu iwita balukasan: “Nuna imet gerewa Hebrew den te munakasan mu na inang tom suen biya nungarsan, bare anananga imet gerewa mu ninguru me nunga sangorsan,” makasan, ale ko iningakasan.

2 Se ko apostle 12 mu Kris suen la nunga aruman se taiman, se nunga manorman, “Ana apostle alo Kaem den baluwara mu betenak ale na inang la kariimet nungara ko laganakko mu me terong. 3 Buta se aga singsang, nina nenenga ningi kari 7, nunga ikia ningo, se Korang Bur nungumik ago terong mam, mu nunga balal se aratomon, se ana kari umutang ura imi bitarmonko nunga betenakko. 4 Bare ana nangata mu Kaem aru ngatanguru se, ko den kariimet nunga manaru se baganakko.”

5 Se kariimet suen la den imi ko kueman. Ale nuna Stephen balman, nu kari gomang ningi nunguning aora biya, se Korang Bur kumik ago terong mam. Ale Philip, Procorus, Nicanor, Timon, Parmenas se Nicolas nuna agotala nunga balman. Nicolas nu Antioch kari, sor bo ko, bare maingkala nu Juda nunga munan ningi utu naguram. 6 Nuna kari 7 umu apostle nomokete nunga awuman se sanami gilingiman. Se nuna nuguting nusupuling te awuman ale nogo ko Kaem ilak ngatangaman.

7 Kaem ko den ninguru tala namakaso. Se kariimet suen biya Jerusalem ningi mu Jesus ko nongomang ningi nunguning akaso. Se priest suen biya tala nongomang ningi nunguning aram.

Nuna Stephen iluman

8 Stephen mu kari gomang ningi nunguning ko kari, se Korang Bur marak sokel ninguru tuikaso, se kilek kilek sokel ago kariimet ningi ninguru bitakaso. 9 Bare kari sang nu ko ko nongomang magakaso, se ilak den te nunumi ilukasan. Nuna Juda kari motam bo, nunga bala Freedmen nunga synagogue ^{▼▼Acts 6:9 Freedmen nunga synagogue: Kari ari imitang se nunga nonet mu ura dungan bagakasan, bare aitak mu mena. Wonong ilagala Alexandria se Cyrene (”Sairini” masan) mu Africa sor te ko wonong. Se Cilicia se Asia mu province ilagala Rome bitaruwara.} masan. Nuna Cyrene, Alexandria, Cilicia, se Asia sor ko kari.

10 Bare Korang Bur ikia ningo Stephen tuikaso, se nuna den te nu me kiakasan. 11 Bare ko nuna kari sang nunga giman, ale den nuna te balmonko mu nunga kasurman, se balukasan, “Ana kari sumu Kaem Moses ilak nunga balu maguwukaso se ikikasan,” iwita ma balukasan. 12 Se munan mu te nuna kariimet, se Juda kari bibiya, se Law Den ko kausa kari bibiya mu nongomang atumukasan. Se namaman Stephen iluman, ale ilak Sanhedrin kari supuling supuling nongote namaman. 13 Ale kari sang Stephen kumik ko den kawel balmonko mu arungak taiman. Se balukasan, “Kari imi tom suen biya anananga kuwim laili kako imi mena namurukko balso. Ale aking Law Den mu kariimet me karo tumonko iwita balso. 14 Mu ana nu den iwita balukaso se ikiman, ‘Jesus Nazareth kari mu temple imi parasuwurok, ale Munan Den Moses balu nangaram mu gurugok se kelemak aratukko.’” Kawel kari uwutata balukasan.

Se kari supuling bibiya suen la Stephen arikuawukasan, bare noko koma motam engel ko koma motam wore iwita se aringiman.

15